Rimishërimi ose rilindja (anglisht: Reincarnation; rilindja e shpirtit në trup të ri) është koncept filozofik ose fetar që një aspekt i një qenieje të gjallë fillon një jetë të re në një trup apo formë tjetër fizik pas çdo vdekjeje biologjike. Ajo quhet gjithashtu rilindje ose transmigrim, dhe është pjesë e doktrinës Saṃsāra të ekzistencës ciklike. Është një parim qendror i të gjitha feve të mëdha indiane, pra Budizmi, Hinduizmi, Jainizmi dhe Sikizmi. Ideja e rimishërimit gjendet në shumë kultura të lashta, dhe një besim në rilindjen / metempsikozë u mbajt nga figura historike greke, të tilla si Pitagora, Sokrati dhe Platoni. Është gjithashtu një besim i zakonshëm i feve të ndryshme antike dhe moderne si Spiritizmi, Teozofia dhe Eckankari dhe gjendet edhe në shumë shoqëri fisnore anembanë botës, në vende të tilla si Australia, Azia Lindore, Siberia dhe Amerika e Jugut. Megjithëse pjesa më e madhe e denominacioneve brenda feve abrahamike si judaizmi, krishterimi dhe islami nuk besojnë se individët rimishërohen, grupe të veçanta brenda këtyre feve i referohen rimishërimit; këto grupe përfshijnë pasuesit kryesorë historikë dhe bashkëkohorë të Kabalës, Katarëve, Alevitëve, Druzëve dhe Rosikurgëve. Marrëdhëniet historike midis këtyre sekteve dhe besimet rreth rimishërimit që ishin karakteristikë për Neoplatonizmin, Orfizmin, Hermetizmin, Manicheanizmin dhe Gnosticizmin e epokës romake, si dhe fetë indiane, kanë qenë subjekt i hulumtimeve të fundit shkencore. Kisha e unitetit dhe themeluesi i saj Charles Fillmore japin mësime për rimishërimin.

Në dekadat e fundit, shumë evropianë dhe amerikanë të veriut kanë zhvilluar një interes në rimishërimin, dhe shumë vepra bashkëkohore e përmendin atë.

Origjina

Origjina e nocionit të rimishërimit është e panjohur. Diskutimi i subjektit shfaqet në traditat filozofike të Indisë. Para-Sokratikët grekë diskutuan mbi rimishërimin, dhe Druidët Celtikë thuhet gjithashtu se kanë dhënë mësim mbi doktrinën e rimishërimit.

Idetë që lidhen me rimishërimin mund të kenë lindur në mënyrë të pavarur në rajone të ndryshme, ose mund të jenë përhapur si rezultat i kontaktit kulturor. Përkrahësit e transmetimit kulturor kanë kërkuar lidhje midis keltëve të epokës së hekurit, grekëve dhe filofisë dhe fesë Vedike  disa madje sugjeronin se besimi në rimishërim ishte i pranishëm në religjionin Proto-Indo-Europian. Në kulturat bujqësore antike evropiane, iraniane dhe indiane, ciklet jetësore të lindjes, vdekjes dhe rilindjes njiheshin si një kopje e cikleve bujqësore natyrore.